RTAP CREDO UNION MODIFIKASI ANTIOKHIA GBKP KLASIS KABANJAHE-TIGAPANAH TAHUN 2015 I AULA GBKP RG Simp. VI

Ringan i Gedung Aula GBKP Simpang VI Kabanjahe, ibas wari Sabtu, 6 Juni 2015. Ilakoken me Rapat Tahunan Anggota Penuh (RTAP) CUM Antiokhia GBKP Klasis Kabanjahe-Tigapanah, ibenaken alu kebaktin si ibabai Pdt. Dormanis S. Pandia, si mengangkatken Galatia 6:2, isingetken segelah ibas pelayanen CUM tuhu-tuhu tetap meningkatken gegeh erdiakonia si mabai labo saja anggota CUM tapi pe ngawan perpulungen si lit isekitar CUM, terlebih ngenehen situasi ekonomi si genduari terjadi, pengaruh erupsi deleng Sinabung ras kebutuhen kegeluhen jelma sinterem genduari.

I iringi musik keyboard si enggo isikapken pengurus CUM Antiokhia, dung kebaktin ilanjutken me Rapat Anggota Penuh (RTAP) CUM Antiokhia si ibabai ketua CUM Antiokhia eme Pdt. Fitnawati br Sitepu, S.Th rikut ras agenda RTAP si enggo isikapken. Dung pengogen laporen pengurus CUM Antiokhia ibereken kesempaten guna nungkun ras menanggapi laporen pengurus CUM Antiokhia TB 2014-2015, piga-piga penungkunen arah anggota eme kerna kemajun-kemajun si sedekah enda enggo ilakoken pengurus CUM eme jumlah sisa hasil pelayanen tahun 2015 buena Rp. 88.725.504,-, litna anggota penuh erkiteken la nabung 6 bulan erturut-turut otomatis jadi anggota biasa, bagepe kerna anggota CUM si la ngelakoken kewajiban ngangsur ibas investasi si seh man anggota. Dung penungkunen maka seh paksana mereken usulen-usulen man pengurus guna peningkaten pelayanen diakonia transformatif ibas CUM Antiokhia GBKP Klasis Kabanjahe-Tigapanah.

Piga-piga usul eme gelah CUM Antiokhia erbahan usaha selain pelayanen permodalen mpegegehi anggota CUM eme usaha pembelian biji kopi si genduari jadi tanamen komuditas i daerah klasis kabanjahe-Tigapanah. Guna mendukung usaha enda maka jasa saham cash si ibereken 3 bulan sekali em ijadiken dana awal. Arah usul si e itampung pengurus segelah i tindak lanjuti gelah tuhu-tuhu banci irealisasiken. RTAP CUM Antiokhia enda iselingi alu erbahan lucky draw man anggota CUM si hadir ibas RTAP enda.

Tahun buku pelayanen 2014-2015 enda buena anggota CUM Antiokhia 280 kalak, anggota penuh 176 kalak, anggota biasa ras luar biasa 104 kalak. Alu saldo saham cash buena Rp. 1.311.629.275,-

Ibas kata sambuten ibas BP. GBKP Klasis Kabanjahe-Tigapanah tuhu-tuhu mendukung kerna kegiaten pelayanen diakonia transformatif GBKP ibas CUM Antiokhia enda janah iarapken maka banci teridahna pelayanen CUM enda bas wilayah Klasis Kabanjahe-Tigapanah enda.

Kata sambuten arah BAPUS CUM GBKP si reh eme Pdt. Anna Br Surbakti, Pdt. Jonvianus Tarigan, ras Erlina Br Sukatendel si ngataken maka CUM Antiokhia enda eme salah sada CUM si paling produktif ibas perdalinen pelayanen CUM si iidah BAPUS CUM GBKP, janah iarapken maka CUM Antiokhia tetap meningkatken pelayanen erkiteken tentuna melala tantangen si bakal ihadapi. Bagepe si mewakili undangen CUM Sada Arih GBKP Rg Bawang eme Pdt. Novita HR.Br. Surbakti mereken ucapen selamat man CUM Antiokhia ibas RTAP enda janah CUM Sada Arih pe bersedia bekerjasama kerna usaha kopi si iusulken anggota CUM Antiokhia.

RTAP enda idungi alu penariken hadiah utama lukcy draw ras itutup alu pertoton si ibabai Pdt. Eduard S. Kembaren.S.Th.

Badan Pusat CUM GBKP ngataken Selamat ibas Pelaksanaan Rapat Tahunan Anggota Penuh CUM Antiokhia GBKP Klasis Kabanajahe-Tigapanah, Dibata Si Masu-Masu. (Humas BAPUS CUM GBKP/Pdt. Miron Sitepu, S.Th)

Komentar

Mungkin Anda Menyukai