Bahan Perpulungen Jabu-Jabu 31 Juli-6 Agustus 2016

“ Njaga Kebadian Perkakas Rumah Pertoton ”

(Bilangen 3:5-10)

Sekalak tukang bangunen sienggo metua ersura-sura pensiun ibas dahinna nari si enggo idahikenna selama puluhan tahun. Merincuh kal “menikmati” masa tua ras keluargana. Janah rencana enda ipesehna man mandorna.

Sedihkal akap si Mandor, sebab arus kebenen sada tukang kayu terbaikna, amin bage gia mandor la nggit maksa tukang ndai. Tapi lit pemindon terakhirna sekali nari lah gia ibangunna sada rumah. Alu ukur si mberat iueken  tukang kayu.

Ngidah tukang na ndai erdahin alu setengah hati, kisat, asal-asalen, maun buatna ka kayu gelah enggo, cirem-cirem saja mandorna janah nina:, “dahiken asa gegeh ras kengasupenndu, bahanlah si mejilena, bahanna bebas kam muatsa sa asa atendu sipenting mejile”.

Kenca dung rumah ndai. Reh me mandor guna meriksasa. Ijemak mandor me pintun siarah lebe janah ngerana ia man tukang ndai, nina:”enda man bandu hadiah bas aku nari”

Senggetkal tukang ndai janah erkadiola. Gundari atas pilihenna maka ia arus tading ibas rumah siasal jadi.

Rumah tukang kayu ndai desken kegeluhenta, tep-tep masang paku, rangka, keramik dahiken lah alu bulat ukur, ula alu “setengah hati” sebab kita paksana membangun masa depanta. Kai pe  dahinta dahiken alu tutus. Termasuk adi kita enggo ipeserap Tuhan (“dikuduskan oleh Tuhan”) Kalak Lewi eme singurusi rumah pertoton, singurusi kerina peralaten Rumah Pertoton si enggo ipeserap guna Tuhan dahiken alu tutus.

Kerina peralaten Rumah Pertoton e enggo ikhususken guna Tuhan (enggo ipebadiaken) emaka barang-barang Rumah Pertoton e arus ipake guna kemuliaan Tuhan saja. La banci ipake guna dahin-dahin si la ngena ate Tuhan, sue ras si ikataken Paulus ibas  I Korinti  10:21 La banci kam minem tare calung Tuhan jenari minem ka tare calung setan. La banci kam man i bas meja Tuhan jenari man ka i bas meja setan-setan. Misalna ingan perjumpaan si ipake guna beribadah man Tuhan, tapi ipakeka guna perjumpaan ras kalak si labo malang man Tuhan, guna merancang kejahaten, guna encakapken penindasen, entah kelaadilen. Ipake ingan ertoto  ipake ka guna nembah berhala, bagepe peralaten sideban entah alat musik la banci ipake guna muji Tuhan ipakeka ibas ingan-ingan kalak mabuk, tah ingan kalak erlua-lua. Kerina barang-barang Rumah Pertoton e arus ijaga kebadianna la banci icemari alu kemelketen doni enda.

Kerina barang inventaris e enggo ipebadiaken Tuhan. Kalak  si  sadar maka kerina barang inventaris Rumah Pertoton eme barang si badia tentu pasti ijagana barang e lebihen asa barang si seh kal akapna mehergana. Emaka kerina nge banci ipertanggungjawabken ibas masa pertanggungjawaben. Lanai bo lit sibene sebab barang si badia e isusun ras ijaga alu mehuli. Termasuk persembahen si pepulung kita ibas ibadah pe arus ijaga kebadiana, e milik Tuhan, si kerajangen Tuhan emaka arus si pake rikutken singena ate Tuhan ras sipertanggungjababken kerina.

Peralaten Rumah Pertoton e badia emaka kalak si ngurusisa pe harus kalak si enggo ipeserap guna Tuhan (ipebadiaken) eme kalak Lewi (Bdk. ayat 13). Kalak Lewi eme sikerajangen Tuhan. Ia me ngenca berhak ras Harun ras keturunen guna pekena-kena peralaten Rumah Pertoton e, sebab kalak enda enggo ipebadiaken guna Tuhan. Adi ateta peralaten Rumah Pertoton e tetap badia emaka sijagalah kebadianta ibas pekena-kenasa. Kalak si tetap njaga kebadianna, eme kalak si alu bulat ukur ndarami Tuhan, alu bulat ukur ia njaga perintah Tuhan ibas ukurna alu tutus merenungkenca suari ras berngi Kata Dibata. Alu kata sideban  kalak sienggo ipebadiaken eme kalak simalang man Tuhan.

Enggo me akapndu kita njaga kebadianta ibas ngurusi kerina peralaten Rumah Pertoton si Badia e? Entah megati dengakal sijemak barang si badia e alu tan si melket seh maka la kita ngasup ngidah pasu-pasu Tuhan bas geluhta amin mejingkat pe kita ku gereja, serayan Tuhan kange kita, tapi malah sebalikna nge sijadi eme kelasangapen ibas jabu? Adi langa siidah pasu-pasu Tuhan e jeralah kita, tutus lah ibas ngurusi peralaten Rumah Tuhan maka banci siidah pasu-pasu e.

EVALUASI :

Uga kerna aksi PJJ-nta silewat ?

DISKUSI :
  1. Barang inventaris gerejanta kerina enggo ipebadiaken. uga akapndu caranta njaga kebadianna gelah tetap teridah maka kerina barang e sikerajangen Dibata?
  2. Kai akapndu akibatna adi inventaris si lit ibas gerejanta ipercayaken man kalak si la nga ipeserap guna Tuhan (badia)? Adi bage kai si arus si bahan?

AKSI :

Sektorta nikapken/ nukur salah sada alat kebersihen Gereja : sapu- sapu, tong sampah, pengepel ras sidebanna.

USULEN LAGU :
  1. KEE GBKP NO: 213 :1-3
  2. KEE GBKP NO: 278 :1-2
  3. KEE GBKP NO: 445 :1—
  4. KEE GBKP NO: 229 : 1,3
TOPIK PERTOTON SAFAAT :
  1. Gelah kerina kita tergerak guna ikut muat bagin njaga ras pekena inventaris
  2. Kerina serayan Tuhan maka banci idahikenna dahin e alu tutus.
  3. Siturah ibas
Pdt. Marta Juniati br Ginting, M.Th
Komentar

You May Also Like