Bahan Perpulungen Jabu-Jabu 04-10 September 2016

“Ergailah kegeluhen” (Pengerana 7 : 1 – 8)

Alex Lewis, 34 tahun, 2013 menderita penakit si ganas ras mengeriken kel. Ia terinfeksi bakteri Streptococcus simangani dagingna. La ndekah, organ-organ kulana mengalami kegagalen sebab infeksi nggo seh ku darehna, emaka terjadi me ‘septicaemia’ (keracunen dareh). Selama sada minggu ia ibas kondisi terburukna ras ndalani perawaten si intensif. Paksa e peluangna nggeluh kitik kel, 3 % ngenca, ras kemungkinen ia mate 97%. Tapi Luar biasa, ia selamat. Walau pe selamat, penakit aneh e nggo erbahansa sada lengan ras duana nahena arus iamputasi. La e saja, bakteri pe nggo ‘menggerogoti; biberna, emaka la ndekah waktuna, ia arus  kebenen tan kiri, duana nahena ras biberna.

Tapi si luar biasa, ‘kecacaten’ labo erbahansa bene ukurna, kitik akapna bana. Ia justru ngakuken maka ia mbue ndatken pelajaren kerna kegeluhen arah pengalamenna si pagit e. “Saya terlihat seperti tokoh kartun Simpsons” nina janahna tawa ngenen lapisen biber ‘buatan’ si leket ngkelilingi babahna.  (ilansir Mirror, 23 Januari 2015). Kenca 3 bulan ia ndalani perawaten guna banci erdalan walau pe alu make alat bantu, Alex ngataken maka genduari ia nggejabken lebih mehuli asangken sebelumna. “Saya telah melihat hal-hal yang luar biasa, hal yang sebelumnya tidak pernah  saya  lihat  dan  tidak  pernah  ingin  saya  lihat”. “Memang sangat sulit untuk memahami, bagaimana tubuh dan pikiran manusia dapat beradaptasi. Saya merasa luar biasa hebat setiap hari ketika saya bangun. Berkat kondisi ini, saya sudah mengubah hidup saya menjadi lebih positif. Apa yang saya alami, membuat saya menyadari betapa berharganya hidup ini” nina Alex. (rsn- onvsoff).

Ibas kegeluhenta, kita cendrung ngergaken kegeluhen si “mejuah-juah” (sehat-sehat, bayak, mehaga ras sidebanna), sementara kegeluhen si kurang mejuah-juahan cenderung si ‘sepeleken’. Tapi arah pengalamen Alex Lewis idatas, si idah maka labo ibas situasi mejuah-juah saja kita banci ngergaken kegeluhenta, tapi ibas situasi si la bagi ukurta pe kita ngasup kita ngergaken kegeluhenta. Ertina, kalak sipentar eme kalak singasup ngidah simehuli bicara pe ibas situasi si la mehuli. Ngasup ngergaken kegeluhenna bicara pe ibas situasi la meherga, la mehuli.

Kai harus silakoken? Pengangkan kiniteken si uga si arus lit ibas kita, gelah dat kita kepentaren sibage rupa? Mari erlajar kita arah Kata Dibata si jadi pengogenta enda.

Pengerana pasal 7 enda, mabai kita guna ngergaken kegeluhenta. Ije ituriken maka Gelar si merim ulin asangken minak wangi si meherga; Ertina, Gelar simerim ngelambangken biak simehuli dingen sejati. Emaka Gelar simerim/ biak simehuli ndauh ulin asangken keduduken sosial si mapan. Kalak sibage tentu lebih erpengaruh simehuli man kalak sideban, asangken kalak si mperdiateken keduduken sosial saja. Lebih penting kepe biak simehuli man kalak singergaken kegeluhenna.

kematen ulin asangken wari ketubuhen. Bageme pe kerna wari kematen kalak sitek ulin asangken wari ketubuhenna, sebab wari kematen eme “awal” kegeluhen simbaru si ndauh lebih  mehuli ras Dibata (bdk. 2 Korinti 5:1-10; Pilipi 1:21-23). Kematen labo hal siman kebiaren kalak sitek (2 Korinti 15: 55-57), tapi perpindahen kegeluhen silebih sempurna. Kematen kalak sitek pe eme pulahna kita ibas erbage-bage kiniseran doni nari (II Korinti 4:7) ras merupaken pintu bengket kuadepen Dibata singgeluh (Pilipi 1:23). Kalak singergaken kegeluhen labo kepe ia mbiar mate adi mate ibas kiniteken man Tuhan.

Salomo pe mbandingken ulih (dampak) penting ibas kesusahen ras ceda ukur sirehna ibas ‘teguren’ kepentaren nari asangken tawa kalak bodoh ras guro-guro kalak lenge si sia-sia. Kalak si ipandang (alu) kepentaren banci saja ceda ukurna, menek pusuhna, tapi ceda ukur ntah menek pusuh e megati kel mpeturah pertobatenna. Sebab genduari ia iperhadapken kubas kinata persoalen nggeluh situhuna. Ceda ate sibage rupa me situhuna ulin asangken tawa ras senang-senang. Kalak si ngergaken kegeluhen kepe lebih ndarami kepentaren asangken ke sia-sian.

Adi kalak pentar nipu, bodoh kap perbahanenna e (Indonesia Pemerasan membodohkan orang berhikmat) ; Adi kalak ngaloken sogok, icedakenna kap biakna si mehuli. Pengerana ncidahken biak kalak pentar silemah, si seri ras kalak sideban (biak doni), si la ngasup megenggeng ngalaken kiniseran/ perbeben ras  la sabar nimai keuntungen siluar biasa (“hadiah”), seh maka kepentarenna jelas la erguna. Kalak singergaken kegeluhen kepe i hindarina biak doni si langasup megenggeng ibas ngalaken tantangen nggeluh, si lari dari kenyataan geluhna seh ncedai kepentaren ras biak simehuli ibas dirina, ndarami jalan pintas (“instan”) guna ndatken kebutuhen ntah sura-surana. Tuhu siakui maka kegeluhenta semakin sulit ibas era perdagangen bebas enda erkiteken kurang kel kesiapennta ndube ibas krina bidang kegeluhen, persaingen makin keras, itambah ka dampak letusen deleng Sinabung si mengganggu ‘multiflier efek ekonomi’ daerahta (kita sitading i Taneh Karo). Mahan bana, melala ‘upaya doni’ si tempa-tempa lanai iakap salah ilakoken: Sogok-menyogok, nebu- nebu, pembodohen, pembiaren ras sideban; ibas dampar sideban, melala kel turang seninanta sijadi korban tawaren kesenangen doni, Narkoba, seks bebas siberdampak HIV-AIDS, Judi ras sidebanna simpeturah kiniseran ras kemiskinen geluh sekelewetta. Alu kata enda, kita ipersingeti maka kalak singergaken kegeluhenna, la ipediatna dirina icedai biak doni alu perbahanen si bodoh, sincedai kiniulin geluhna.

Pengerana la saja ncidahken sada perbandingen si ‘ihayatina’ tuhu-tuhu: ” Kai-kai pe, ulin kap pendungina asangken pemenana “. I ikutkenna pe ‘kualifikasi’ pendukungna: ” ulin ate saber asangken ukur meganjang“. Ertina, guna banci setia jelas ibutuhken   kesaberen   ate   si   nggedang.   Ras,   kita   tetap  perlu metenget gelah ula ‘tergoda’ guna ngadi ope denga dung erkiteken meganjang ukur. Ntah pe mbiar teridah gagal, misalnya; ntah bosan; ntah la siap ndalani proses “perendahan” ras “pemurnian” karakter si reh beratna/ sulitna. Jesus nggo mereken usihen simbelin paksa Ia ngelapor man Bapa: ” Enggo Kucidahken kemulianNdu i doni enda, enggo Kudungi dahin si  iberekenNdu man bangKu” (Johanes 17:4). Metedeh nge ateta mpermuliaken Tuhan ibas pendahin ras pelayanenta? Mari sidahiken dahin si  nggo ipercayaken man banta alu la “setengah hati” ras la “setengah jadi”. Eme biak kalak singergaken kegeluhenna.

EVALUASI :

Uga kerna aksi PJJ silewat !

I.        Studi Kasus :

Piga-piga Moria tangis alu kesi-kesi tupung megiken renungen si ibabai sekalak Pandita tupung rombongen salah sada Moria Runggun berkunjung ku YKPC GBKP Alpha Omega. Waktu isungkun Pandita e, kai sierbahansa menek atena, nina piga- piga njababsa : “Aku kuakap sikatakenndu e, Pandita … sedekah enda, ceda kal ukurku natap anakku si gutul, la meteh mehuli, kasar, la mehamat man orangtua, perate-ate, ras sidebanna… Tapi kenca ibabaindu ndai natap anak-anak Alpha Omega enda alu mbages ras mbandingkennca ras anak ntah kempu kami, turah penggejabenku maka lebih sempurna kepe anak si ipelimiken Tuhan kubas jabu kami e, ngkai maka pandangen kel kuakap ia rusur, kurang kal kepe kami ngataken bujur man Dibata…” nina. Emaka nina Pandita e man bana krina: “Adi bage, mulih kam kari Alpha Omega enda nari, reh sehatna kam kerina, reh gedangna umurndu sebab reh malemna atendu nggeluh. Sebab reh jadina atendu anakndu ras kempundu amin gia lit nge kekurangenna. Janah nggo seh Kata Dibata si iogeken kami ndai man bandu krina, maka : Labo dosa ise pe erbahansa kalak enda ‘berbeda’ ras kita kebutuhenna ras kita “(Difabel)”, tapi gelah teridah kuasa Dibata arah kegeluhenna. Genduari kuasaNa e teridah ibas membangun kesadarenndu maka sempurna kap anak ras kempundu ibere Tuhan, ngasup kam   ngataken   bujur  sekalipe   lit   kekurangenna,  jenari  reh sehatna pe kam mulih jenda nari”. Nina Moria e kerina ngaloisa

: “Amiiin!”

DISKUSI :
  1. Kai nge pelajaren simehuli siturah ibas ukurndu kenca iogendu pengalamen Moria idatas ? Turikenlah !
  2. Nggo nge akapndu kam ngergaken kegeluhenndu sedekah enda? Turikenlah !
AKSI :

Si langa olahraga sedekah enda, pilih salah sada si mbabai kita reh sehatna.

USULEN LAGU :
  • KEE GBKP NO: 374 :1-3
  • KEE GBKP NO: 254 :1-3
  • KEE GBKP NO: 272 :1—
  • KEE GBKP NO: 273 :1-2
TOPIK PERTOTON SYAFAAT :
  1. Gelah kerina ngawan perpulungen GBKP meteh ras nggit ngergaken
  2. Gelah kerina ngawan perpulungen nggit nirangi biak nipu, sogok ras nogok, merangap si ncedai kepentaren ras kiniulin geluhna.
  3. Program Pembinaan Warga Gereja GBKP ibas kerina tingkaten (Moderamen, Klasis ras Runggun) banci tetap “berorientasi” kubas ngergaken kegeluhen perpulungen ras

Pdt. Mestika N. Ginting, S.Th M.Psi

Komentar

Mungkin Anda Menyukai