Bahan Perpulungen Jabu-Jabu, 02-08 Oktober 2016

“Bujur Makeken Sukat-sukat” (Lukas 3:7-14)

 

Kebujuren ras kejujuren eme 2 hal si tetap jadi  pergumulen i tengah-tengah bangsanta. Adi genduari kita isuruh ndarami kalak berpendidiken tinggi, berjabaten tinggi, berpenghasilen tinggi seh kal nukahna, sabab i japape lit, tapi ndarami kalak bujur ras nggeluh ibas Kejujuren (“berintegritas tinggi”) seh kal sulitna. Krisis kebujuren ras kejujuren enggo jadi pinakitta ras. Ibas kegeluhennta si tep-tep wari pe biasa nge si jumpai, lit Ibas kerina golongen ras lapisen masyarakat. lit ka si  idah maka lit pengemis si nuduhken maka ia cacat secara fisik tapi si tuhuna sehat nge ia. Ituduhkenna kecacatan e gelah mekuah ate kalak si mentas. Masyarakat pe mawen-mawen ikut muat  bagin ibas kinilabujuren, program-program pemerintah si ibereken man masyarakat guna nampati masyarakat si ekonomi lemah pe kepeken melala ka ialoken kalak si tergolong mampu. Piga-piga perbinanga pe, alu erbage-bage alasen mawen-mawen terlibat ka alu nukangi alat timbang. Kebiasaan pungli (pungutan liar) si nggo jadi rahasia umum i tengah-tengah negaranta. Oknum-oknum penegak hukum ras pejabatta ikut muat bagin ibas praktek ketidak- jujuran, alu mengkorupsi uang negara/hak kalak si deban ntah pe terlibat ibas penyalah gunaan wewenang ibas jabaten  si ipercayaken negara man bana.

Kinilabujuren enggo mengketi kerina dampar kegeluhen manusia janah kinilabujuren mpeturah si la mehuli ibas kegeluhen. Dibata tuhu-tuhu la senang nandangi kinilabujuren. Begepe man kalak si makeken sukat-sukat alu dem kinilabujuren. Kinilabujuren mpeturah rawa Dibata janah mpe-reh ukumen man banta. Enda me berita si ipeseh Johanes tupung ia erberita kerna kerehen  Jesus. Johanes si ipilih Dibata guna erberita kerna kerehen mesias, nuriken gelah kerina manusia nikapken dalan man mesias e ibas geluhna alu ngadiken kinilabujuren si ilakokenna. Salah sada  sudut pandang si igambarken Johanes kerna mesias e eme gambaren si nehken keadilen ras si maba ukumen man kalak si ngaloken kinilabujuren.

Johanes mpersingeti gelah kita ngelakoken pertobaten. Labo pertobaten si ituduhken arah kegeluhen peribadahen man Dibata, tapi pertobaten ibas kegeluhen si nyata, ibas kegiatennta si tep-tep wari. Johanes ngingetken perpulungen gelah nggeluh dem alu keleng ate (“cinta kasih”). Engkelengi temanna manusia janah nggit berbagi, la muat bagin kalak si deban tapi mereken baginna guna kepentingen kalak si deban. Pertobaten pe icidahken ibas perbahanen si la korupsi janah jujur ras bujur. Bujur banci siertiken nggeluh bagi arusna. Nggeluh alu kai si lit ibas kita alu la muat sikerajangen kalak sideban. Enda me sikap pertobaten si niarapken Dibata

Indonesia termasuk ibas kelompok negara si tingkat korupsina tinggi. Labo pemerintah ntah pe kalak si erkuasa saja, tapi korupsi enggo mengketi kerina kegeluhen masyarakatta. Ulihna kita nggeluh ibas kekurangen, kemiskinen ras kemelaraten. Dibata laerngena ate nandangi prilaku koruptif janah buah perbahanen si bage reh ukumen Dibata. La banci lang arus silakoken pertobaten massal, mpelimbarui budaya geluhta tapi sibenakenlah arah kegeluhen pribadinta, kita lebe maka banci jadi usihen man kalak si deban.

EVALUASI :

Uga evaluasi aksinta Minggu si lewat !

DISKUSI :

  1. Kai nge maksud Johanes mpersingeti kerina  kalak  si  reh  ndahi ia?
  2. Pernah nge kita korupsi ntah muat kai si la jadi hak ta?

AKSI :

Usahakenlah gelah la korupsi ntah pe la muat kai si la hak ta.

USULEN LAGU :

  1. KEE GBKP NO: 196 :1-3
  2. KEE GBKP NO: 356 :1-2
  3. KEE GBKP NO: 343: 1—
  4. KEE GBKP NO: 309 :1,3

TOPIK PERTOTON SYAFAAT :

  1. Kerina ngawan perpulungen la ngelakoken praktek
  2. Gereja la terlibat ibas praktek korupsi janah jadi pelopor memerangi
  3. Pemerintahta bersih dan jujur ibas korupsi

Pdt. Vicardo Ginting, S.Th

 

Komentar

You May Also Like