Perbaikan Bahan Bimbingan Khotbah GBKP 2017

No                          : 0146/IV-d/2017                                                                    Kabanjahe, 7 Pebruari 2017 Lamp.                    : 2 eks

Hal                        : Perbaikan Bahan Bimbingan Khotbah GBKP 2017

 

 

Man sinihamati :

  1. BP Majelis GBKP Klasis                                                
  2. Majelis GBKP Runggun                                         
  3. Unit Pelayanan GBKP                                                
  4. i-

Tempat

 

Mejuah-juah ibas gelar Tuhanta Yesus Kristus,

Terlampir ikirimken kami man banta kerna Perbaikan Bahan Bimbingan Khotbah GBKP 2017. Janah ilampirken kami pe man banta kerna Tulisen Bahan Bimbingen Khotbah si payo guna tanggal 26 Maret 2017 bage pe tanggal 24 September 2017.

Bagenda me surat enda isehken man banta. Ibas kerjasama si mehuli ikataken kamibujur. Dibata simasu-masu pelayanenta.

 

 

MODERAMEN GEREJA BATAK KARO PROTESTAN

Ketua Umum,                                  Sekretaris Umum,

  

Pdt. Agustinus P. Purba, S.Th, MA        Pdt. Rehpelita Ginting, S.Th, M.Min

cc. 1. PPWG GBKP

  1. Pertinggal

 

 

 

Perbaikan Bahan Bimbingen Kotbah GBKP 2017

  1. Tulisan tanggal 26 Maret 2017 dan 24 September 2017 isi tulisannya tertukar. Lampiran terlampir.
  2. Tulisan tanggal 19 Februari 2017 (Sexagesima) ogen Imamat 19 : 1-2, 9-18.
  3. Tanggal 14 April 2017 (Jumat Simbelin). Invocatio : Johanes 10 : 17-18.
  4. Tanggal 28 Mei 2017 (Exaudi).

Tema : “Ersikaplah, Begiken Sora Tuhan”.

  1. Tanggal 18 juni 2017 (Minggu UEM). Kotbah : matius 5 : 13-16.
  2. Tanggal 22 Oktober 2017 (Minggu XIX kenca Trinitatis). Perbaikan di buku Almanak GBKP tahun 2017 di bagian kotbah Jesaya 2 : 6-18.

 

 

 

Bimbingan Khotbah Tanggal 26 Maret  2017 ( Minggu Passion V : Letare“ Teridahlah”)

 Invocatio                       : Tapi nina Tuhan, “ Ola nehen kuga gedangna ras kuga jilena rupana. La ia Kupilih, sabab pertimbangenKu la bali ras pertimbangen manusia. Adi manusia inehenna si teridah arah darat, tapi Aku kupernehen pusuhna” ( I Samuel 16:7)

Ogen                              :  Epesus 5:8-14 ( Responsoria)

Khotbah                        :  I Samuel 16: 1-13 ( Tunggal)

Tema                             : “ Kam Ipilih Dibata, Meriahlah”

Pokok Pikiren              : –      Nuriken latar belakang teks ( Invocatio, Ogen ras        Khotbah)

  • Nuriken Tujuan Dibata milih kita guna jadi terang ras nadingken kegeluhen si gelap.
  • Nuriken maka pemilihen Dibata labo seri ras cara manusia
  • Nuriken ulih kalak si enggo ipilih Dibata

I.KATA PERLEBE

Jadi kalak si terpilih I bas sada dampar  banci jadi peturah   keriahen tapi ibas dampar sideban banci jadi sada kesusahen. Meriah siakap kita jadi kalak siterpilih erkiteken siakap tunggungen kita asangken kalak sinterem, ndatken sada pengakun ras kehormaten, ndatken kesempaten ras keduduken bagepe kemungkinen ras fasilitasina. Tapi banci jadi kalak si terpilih e jadi sada kesusahen sebab sibayangken mbue ije dahin simberat nandangi sialoken,mis. nambahi dahin, mbue tantangen ras kesuliten, la lit siakap untungna/ulihna .

Situhuna meriah ntah lang siakap adi kita jadi kalak terpilih bergantung uga caranta ngatusi ras ngergaken keterpilihen . Respon ngaloken ras ndalanken keterpilihen eme sebage buah kinitekennta ras ndalanken  misi Dibata. Tentu ibas kita ndahikenca erkiteken keterpilihennta pasti lit ije tantangen ras hambaten janah eme mpebagesi  pengertin ras pengergannta nandangi keterpilihen e.

 II.ISI

Penolaken Dibata nandangi Saul  sebage raja kalak Israel erbanca ceda ate Samuel. Benana pe Samuel labo setuju sistim pemerintahen bangsa Israel alu kerajaan tapi erkiteken desaken kalak Israel mindo raja maka jadi me saul raja pemena kalak Israel janah Tuhan pe mpelepas kai siipindo kalak Israel kerna si e. Saul sebage raja la ndalanken kai  siiperentahken Tuhan tupung kalak Isrel erperang ngelawan bangsa Amalek sebab enggo iperentahken Tuhn mana Saul maka kerina si lit ibas kalak Amalek arus ikernepkenna   tapi siilakoken Saul eme si la terpake  entahpe si la meherga ngenca ikernepkenna. Kai si ilakoken Saul enda erbanca ceda ate Tuhan sebab si enda merupaken tindaken nadingken ras  la ngikutken pedahNa.

Tugas man Samuel  guna nikapken pengganti Saul tuhu mberat sebab bicara sienda ieteh Saul tentu kesah Samauel taruhenna. Di samping si e Samuel sendiri lenga metehsa ise si ipilih Tuhan ras uga cara milihsa. Ibas proses pemilihen enda teridah ije unsur sura-sura manusia ras sura-sura Dibata , penilaian manusia ras penilaian Dibata.  Dialog antara kemanusiaan ras ketuhanen rusur terjadi ibas pemilihen sekalak jelma janah enda menentuken kalak siipilih kita ibas ngaloken ras ndahiken dahin e.  Tantangna teridah uga Samuel aminna ia sekalak Imam perukuren manusia denga ipakena I bas ndalanken misi Dibata. Tuhu enda hal siwajar sebab ia ngikuti sukat entahpe kriteria umum ibas milik sekalak raja  perlu tampilen phisik simenarik ras memenuhi sarat al. gedang ras mejile sebab sie menyangkut kubas wibawa ras pengaloken kalak.

Pemilihen daud sebage raja mabai Samuel bagepe kalak Israel  ku bas cara simbaru ibas ngelitken sekalak raja siberbeda ras bangsa-bangsa sideban entahpe kriteria secara umum. Mpelebeken pertimbangen Dibata ibas milih suruh-suruhenNa menjadi hal sipenting . Pertimbangen Dibata eme ngenen ku bas pusuh labo ku bas hal-hal lahiriah. Pusuh me menjadi sentral kerina  perukuren ras tindaken manusai.  Arah pusuh nari me teridah integritas, karakter ras komitmen sekalak jelma guna ngaloken ras ndahiken dahin  bagi si ngena ate Tuhan. Berbeda ras doni mengutamaken otak,otot  ras penampilen si rusur iutamaken. Payo si e tetap penting tapi si paling penting eme pusuhna.

Karakter Daud sebage sekalak pemimpin situhuna teridah ibas teks enda. Daud tetap erdahin mpermakani biri-birina aminna ia sisada ndahikennca. Tipekalna eme kalak la pertewas. Pendahinana teridah labo guna ndatken popularitas tapi erkiteken  karakterna  siertanggungjawab. Bicara la pe ia iperhitungken ras I petandaken bapana guna ikut ipilih labo ia megelut ras nembeh . Orientasina labo kubas jabaten ras kekuasaan tapi  erdahin ras ngelai.  Sikap Daud labo berubah ope denga ia ipilih ras kenca ia itangkuhken jadi raja. Kemeteruken ukur tetap teridah ibas dirina labo lit cakapna simeganjang man senina-senina  singataken maka tunggungen ia asangken kerinana. Labo ia tersinggung man bapana si labo mperhitungken ia. Jenari kenca ia itangkuhken jadi raja labo mis atena menggeser kursi Saul. Bagi kuan-kuan kalak Karo “ timai kuah maler”  bagem sikap Daud  sabar dingen la rangap nandangi jabaten.

Tuhan milih Daud labo asangken senina-senina labo erkiteken beluhen ia asangken senina-senina tapi erkiteken idah Dibata kuga pusuhna sikap jadi sekalak pemimipin. Dibata mperlengkapi sikurang ibas Daud janah Dibata nampati ia I bas ndahiken dahinNa. Erdandanken si e me maka  kesah Dibata lit bas ia sebage tanda Dibata similihsa, ras  sinemani ia ibas dahiken dahin e. Kesah Dibata lit bas Daud em erbanca pusuhna tetap mehuli guna jadi kalak si terpilih.

 III.PENGKENAINA

Sada keriahen man banta  adi kita ipilih Dibata lako ndahiken dahinNa sebab kita iatankenNa ikut muat bagin ibas ndalanken misi Dibata. Keterpilihenta enda arus sirespon alu kemeteruken ukur  sebab kita ipilihNa labo erkiteken pentaren entahpe beluhen  asangken kalak. Keterpilihen enda sinen sebage sada perkuah ate Tuhan em erbanca meriah siakap ngalokenca. Nggit denga Tuhan milih kita maka arus sirespon alu nggit ngalokenca ula ka situlak. Penolaken dahin Tuhan berarti  kurang denga sigejapken erti perkuah ateNa si enggo sialoken kidekah enda.  Tapi pe si perlu sihindari maka ula lit pemaksaan sura sura maka kita si arus si terpilih guna ndahiken dahin e . Adi sipaksaken pe janah kedungenna  sialoken dahin e maka labo kari mabai kiniulin man banta bagepe nandangi pendahin e.

Aminna labo erkiteken kinulinnta maka kita terpilih tapi pe arus sieteh maka adi kita enggo ipilih guna ndahiken dahin arus sicidahken uga kin kegeluhen kalak si enggo ngaloken perkuah ate Tuhan ibas ndahiken dahin e. Ibas invocatio Efesus 5:8-14, Paulus ningetken kalak Efesus maka adi kita enggo terpilih jadi anak-anak Dibata la banci lang kegeluhenta arus berbeda ras kalak sideban. Kita igelari anak-anak Dibata erkiteken enggo sitadingken kegeluhen sigelap janah encidahken kegeluhen siterang. Arah enda berarti adi kalak siterpilih igelari anak-anak Dibata maka la banci lang ibas ibas ia ndahiken dahin e maka teridah cara geluh ras kualitas pendahinna berbeda. Mbue si berbeda siisingetken Paulus sincidahken kualitas anak-anak Dibata si sangat mempengaruhi situasi ras lingkungen ija ia tading. Terang si ibabana erbanca kegelapen sikelewetna jadi bene. Keterplihennta guna ndahiken dahin Tuhan mereken pengaruh sipositif ras mabai kemajun ku sidebanna, mis.disiplin, jujur, transparansi, ras la korupsi.

IV.USULEN LAGU

1.308:1,2,3

2.319 :1,2,3

3.462:1-

4.286:1,2,4

5.445 :-

6.102:1,4

V.PERTOTON SYAFAAT

Notoken kerina anak-anak Tuhan si erdahin ibas kerina bidang ras jabaten  gelah banci kehadirenna mabai terang ras pengaruh sipositif ibas ia ngaloken ras ndahiken dahin e.

Pdt.Rehpelita Ginting –Sekum Moderamen

 

 

 

 

Komentar

You May Also Like