Perbaikan Bahan PJJ 26 Maret-1 April 2017

Kiniersadan Ajar-ajar Jesus

(Johanes 17:21-26)

O Bapa, ertoto aku man baNdu gelah ersada min ia kerina. Ersadalah min ia ras kita, bagi Kam ersada ras Aku janah Aku ersada ras Kam, ersadalah min ia gelah tek doni enda maka Kam me si nuruh Aku.

Jesus ertoto ope lenga IA bengket ku bas kiniseran i kayu persilang. PertotonNa si pemena guna diriNa jine gelah IA ipermuliaken, pertotonNa si peduaken guna ajar-ajarNa, ras sipeteluken guna doni enda ras kerina isina.  Arah pertoton Jesus e teridah maka kekelengenNa  kuh (sempurna). Amin pe lanai ndekah IA ngalaken kiniseran ras ibaba ku kayu persilang, ertoto denga IA nandangi ajar-ajarNa si paksa sie  lenga enterem gelah kerina pagi banci nggeluh ersada. Jesus pe tek man ajar-ajarNa maka kerina nge pagi ia erbintuas, erbenting kibul, nuriken ras naksiken kerna Jesus ras kuasaNa si mbelin man doni enda ras isina kerina, amin pe paksa ia ras Jesus denga, kurang penandaina kerna Jesus. Seh maka ipersokenNa IA, dingen nadingken IA i kayu persilang.

Kiniersadan si uga nge si imaksudken Jesus I bas pertotonNa e ? kiniersadan secara pribadi, bagi IA ersada ras Bapa. Kai si ukurken Bapa, e kange si jadi perukuren Jesus, kai sura-sura Bapa, e ka nge si isuraken Jesus, kai tujun Bapa man doni enda e ka nge sijadi tujun Jesus. Sada visi ras misina nandangi doni enda. Jesus patuh ndalanken kai si isuruh Bapa. Bageme gambaren kiniersadan.  Sada perukuren, sada bas sura-sura, sada bas tujun. Tujunna kerina eme, gelah tek doni enda maka Jesus e me juruselamat si tuhu-tuhu.

Uga maka banci tujun enda tersehi ? adi kerina ajar-ajar e patuh man Jesus bagi Jesus patuh man Bapa. La kepentingen pribadina iukurina, la sura-surana ipejangjangna, tapi sura-sura Jesus idalankenna ras iperjuangkenna. Uga gelah i bas  ajar-ajar lit biak meteruk ukur ras sikeleng-kelengen. Guna sie me maka Jesus tetap ertoto amin pe enggo I bahanNa si man usihen tupung ia murihi nahe ajar-ajarNa. Kiniteruken ukur e tetap jadi persyaraten i bas kiniersadan.

I bas kegeluhen ajar-ajar melala kal nge perbedan, subuk arah pendidiken, pendahin, pengalamen, kuta si pelain-lain ras sidebana. I bas si pelain-lain e idilo Tuhan gelah ersada, si empersadakensa eme keleng ate Kristus.

 Adi keleng ate Kristus simpersadakensa, lanai lit ije ke-akun (ego), lanai ngukuri kelompokna entah keluargana saja (margaisme) lanai ‘sembelahen pengenen mata,’ bagepe  gereja  lanai ngkuri organisasi gerejana saja. Tuhu melala runggana guna nggeluh ersada, sebab doni enda ersura-sura gelah kita erbana-bana. Si jadi gegehta eme kap tetap ersada ras Kristus, eme kunci utama ersada ras kerina ajar-ajar lako encidahken kekelengen  man sesama ras sekelewetta.

 

Evaluasi

Ugange perdalanen aksinta i bas minggu si lewat ?

Diskusi

 

  1. Asa pengidah ras pemetehta, kai nge si jadi  sierbanca maka banci gereja la ersada?
  2. Kai nge tekatta kenca si orati pertoton Jesus sendah?

Aksi

Sipindo gegeh man Tuhan guna pengasupna kita erdame ras temanta si sedekah enda la kita meriah.

Usulen lagu
1. KEE GBKP No. 313:1,2

  1. KEE GBKP No. 209:1,2
  2. KEE GBKP No. 209:3,4,5
  3. KEE GBKP No. 325:1-3

 

Topik doa syafaat

  1. Gelah kerina perpulungen ngasup nggeluh I bas kiniersadan
  2. Perpulungen ngasup naksiken Kristus si jadi juru selamat doni enda arah perbahanen ras kekelengenna
  3. Si turah bas perpulungen.

 

Pdt. Nurbety br Ginting

 

Download File

Komentar

You May Also Like