70 Tahun Indonesia Merdeka Oleh : Pdt. J Keliat

Merdeka, Merdeka, Merdeka ! engkai maka telu kali ucapen Merdeka ? Presiden pe-7 ken Indonesia Joko Widodo ngataken man kabinetna bage pe kerina rayat indonesia : Kerja !KerjaKerja !

Enggo 70 tahun kita merdeka, enda Presiden pe 7 ken si nehken perluna erdahin alu tutus dingen jujur. Nterem dengan pemimpin bangsa enda la tutus erdahin terlebih la bujur. Teptep wari si oge berita ibas koran, si begi arah TV, si oge berita ibas internet, kepala-kepala daerah terlibat ibas ke lajujuren selaku kepala daerah, subuk bidang perduiten, pemilihen kerna dirina jadi kepala daerah, jelasna KKN denga. Adi 70 tahun silepas terberita ungkapen “tanpa pamrih”, gundari kai pe “pamrih”, kai pe nggalar, Sumut (semua urusan musti uang tunai). Ertina ibas 70 tahun enda, pembangunen fisik tambah maju, sedangken pembangunen mental reh mundurna. Mbue SMS masuk ku bas HP-nta berita la bujur si isina kerina bermuara kubas duit.

Mbue tangkapen KPK subuk si enggo iproses bage pe sedang ras lenga iproses. Emaka payo kai si ikataken Jokowi. Perlu revolusi mental. Adi ia pe ngataken maka perlu iban revolusi mental, kita selaku anak-anak Tuhan si enggo itebusi Jesus dosa-dosanta, arus kel mendukung program enda, ndalanken pembangunen mental enda selaku pengataken bujur man Tuhan. Tutuslah ateta ngajari anakta ras kempunta, sebab nina Tuhan : kalak jahat labo pulah, tapi kalak bujur la banci lang nggeluh erkiteken tetap ia ernalem man Dibata (Habakuk 2:4)

Adi bangsanta enggo 70 tahun merdeka, Juli si lewat gerejanta enggo 74 tahun njayo. Ibas kaiten ras perawaten inventaris gereja ipersingeti kerina Runggun Gereja gelah sipakeken kesempaten enda guna ngelitken surat taneh gerenta man si langa li suratna. Adi surat Camat denga, tingkatken ku BPN. Mbue erta/taneh si iwarisken Zending nai lanai terkuasai gerejanta perban la diate ngurus surat-suratna. Bandu turang/senina kami si sangana erdahin ibas Badan Pertanahen enda, persingeti Runggun Gerejanta gelah ngurus surat taneh enda dingen I sampatindu ia alu mereken penjelasen. Adi lit dalan kemudahen bereken ras sapatindu alu la mengabaiken kejujuren.

Selamat ulang tahun man kerina Mamre, subuk pengurus bage man kerina anggota. Bulan enda enggo ka tambah umur Mamre setahun nari. Sekaligus Mamre erbahan Mupel guna nehken pertanggung jawaben tugas lima tahunen, nikapken program kerja, jenari milih BPP si mbaru.

Dua puluh dua Klasis ibas GBKP enggo dung milih BP Klasis si mbaru periode 2015-2020 termasuk dua Klasis simbaru mekar (Kabanjahe ras Berastagi). Alu bage genduari enggo lit 24 Klasis ibas GBKP. Tahun 2016 mekar ka Klasis Tigabinanga ras Jakarta-Bandung, ras terakhir 2017 mekar Klasis Riau-Sumbar. Tahun 2017 pagi enggo 27 Klasis ibas GBKP. Selamat bertugas man kerina BP Klasis si mbaru. Adi periode si lepas lit 9 kalak BP Klasis, genduari 5 kalak nari ngenca. Hal enda labo erkiteken, reh kitikna siman dahin, Tri Tugas Gereja, administrasi, keuangen, konseling, rsd, tetap denga man dahin. Ertina dahin la urak, akibatna jam kerja arus tambah, labanci dekahen ngeranai. Syaloom.
Sumber : Warta Gereja Marantha (WGM) GBKP

Komentar

Mungkin Anda Menyukai