GBKP Rg Jakarta Pusat Mendukung Pelayanan Kesaksian Klasis Lau Baleng
Pdt. Imanuel Ginting, S.Th | 17-12-2022
Kabanjahe, 8 Desember 2022. Semangat pelayanan jemaat sipemena tetap turah i tengah pelayanan GBKP. Enda me semangat sisampat-sampaten dingen situmpak-tumpakan simegeh nampati sikurang megegeh, ija runggun ula ngukuri bana saja, sue spirit Perjanjian Baru. Hal enda tangkas teridah bas pengendesen dukungen 1 unit sepeda motor guna detaser penginjil, si jadi kado natal sispesial man Klasis Lau Baleng bas Runggun GBKP Jakarta Pusat nari. Simake selaku kuda dalan meritaken berita simeriah, mejingkat ndahi perpulungen alu litna perlengkapan lapangan. Bageme kata sambuten siipesehken Ketua Umum Moderamen GBKP Pdt. Krismas I. Barus, MTh. LM tupung perjumpaan zoom pengendesen sada unit sepeda motor pelayanan siipeseh BPMR GBKP Jakarta Pusat man Klasis Lau Baleng. Rikut pe Moderamen GBKP nehken notoken kerina serayan i Runggun Jakarta Pusat sehat-sehat dingen ipasu-pasu Tuhan simpar bas rejeki pendahin/pencarin.
Ketua Klasis Lau Baleng Pdt. Jonatan nehken pengataken bujur, erkiteken Runggun Jakarta Pusat, dingen tim PI tuhu-tuhu enggo berkesan bas dukungen nyata siteridah kidekah enda. Hal enda pe teridah bas pendungi GBKP Lau Mulgap simbue kal isampati. rikut ngikutken maka sepeda motor siibereken man detaser penginjil guna mendukung pelayanen. Sepeda motor e tetap nge jadi inventaris klasis bas menjangkau perpulungen-perpulungen ipake detaser. Tuhu nampati dingen ulihna ertambahna jelma siiselamataken arah pelayanen kesaksian i Klasis Lau Baleng.
Perwakilan Klasis Jakarta Banten ngataken maka pendahin enda eme pendahinsi luar biasa bas ngelitken sepeda motor. Kegiatan kesaksian bas BPMR Jakarta Pusat enggo mencatatken sejarah sigedang bas pelayanan subuk i Klasis Lau baleng, Dairi, bagepe Sibolangit. Buku 67 tahun Jakarta pusat bas sambuten Moderamen GBKP ncatat kidekah tahun 2016-2018 enggo ilakoken pelayanen PI i Klasis Lau Baleng, bagepe Dairi ras Sibolangit, dingen seh pe kerjasama ras badan pekabaren Injil ku Afrika ras India. Mbelin pengarapen maka PI i Moderamen GBKP banci erdalin alu mehuli alu kebijaken simenggerakken kerina runggun simbelin banci nampati, termasuk nampati kerina detaser. Sinergi Moderamen, Klasis ras runggun enda penting guna iterusken sebab melala denga dahin siman dahinken, dingen mbelang denga daerah siman siaren. Pelayan Runggun Jakarta Pusat Pdt. Jekson Barus ngingetken segelah sepeda motor siibereken banci jadi kelengkapen bas erberita simeriah, dingen bas makekenca ula seh sakit, tapi tetap sehat-sehat teruh penampat si Mada Gereja.
(Pdt. Imanuel Kemenangan Ginting, STh)