Melala Persoalen, Si La Terjabab Siteremi Ndungisa
Pdt. Imanuel Ginting, S.Th | 30-10-2023
26-28 Oktober 2023 RC Sukamakmur. Sidang Majelis Kerja Sinode (SKMS) GBKP tahun 2023 enggo erkedungen alu mehuli bas semangat kiniersadaan ras ketedehen guna GBKP ertambah-tambah kiniulin dingen ernanam ku sienterem, ku tengah doni enda i teruh pengarak-ngarak Dibata ras gegeh Kesah si Badia. Ketua Umum Moderamen GBKP Pdt. Krismas I. Barus, MTh. LM bas kata sambutenna ngingetken jati diri GBKP erurat ku bas biak Dibata si aktif erkarya membangun tatanan kegeluhen si mehuli man kerina tinepa, simpeteruk ba-Na i bas diri Yesus Kristus guna nehken peraten Dibata i doni bagi i surga, rikut pengarak-ngarak Kesah si Badia simereken pengajaren dingen kepentaren. Selaku gereja si berbudaya Karo, lit bas kita cikepen tatanen kegeluhen si menyangkut nilai-nilai : sakral, tujun nggeluh si mehuli, kegeluhen si meherga, etika-moral, tata relasi, ekologi, ekonomi, perangkat pendungi persoalen. Enda erbahanca kalak Karo nggeluh terpelihara i bas kiniersadaan ras saling ketergantungen subuk sapih manusia dingen seisi tinepa.
Selaku pewaris tradisi gereja reform maka GBKP bena-benana nari nehken pelayanen si sangat membumi, alu focus 4 area, eme :
- Mbangun kiniteken alu mbangun Rumah Pertoton ingan ersembah ras erlajar kerna kata Dibata.
- Mbangun pemeteh perpulungen ras masyarakat alu mbangun sekolah-sekolah.
- Mbangun kesehaten masyarakat alu mbangun rumah sakit.
- Mbangun kesejahteraan masyarakat alu mbangun sektor pertanian, peternakan, perikanan ras pusat pasar.
Fokus enda terkait erat ku sasaren pelayanen GBKP 2023 “Anggota perpulungen berpartisipasi aktif i bas pelayanen,” rikut bengket ku sasaren pelayanen tahun 2024 “Berkarya ras erguna man jelma sideban.”
Ngikuti dinamika jaman, tantangen kegeluhen manusia terus berkembang secara sosial, tekhnologi, ekonomi, lingkungen, politik ras nilai-nilai. Tantangen kondisi enda berubah manuver secara cepat, bergejolak, la terarah, ngikuti tawaren nilai baru si la pasti, mbeneken aspek spiritualitas-sakralitas, bergeserna ukuren etik moral, kompleksitas si rumit dingen serbut (volatility, uncertainty, complexity, ambiguity : VUCA). Situasi enda tentu berdampak ku beragam wujud i tingkat sinodal, klasis, runggun, perpulungen seh keseharian jemaat. Enda memposisikan GBKP setiap wari lit bas masa transisi alu tantangen panggilan baru. Megati kal teridah rikut tergejap maka GBKP (secara pengajaren, mekanisme ras perangkat ngalaken persoalen) la cukup mampu guna ngalaken tantangen jaman si reh e. Kecibal enda me sijadi pendilo man kerina serayan GBKP gelah tetap metenget ras tutus menggumuli proses penterjemahen tugas panggilan GBKP, amin gia kelengkapenta terbatas. Itegasken Ketua Umum, “Adi ban nahangna nge dahin e, labo kita siipilih Dibata. Melala persoalen, si la terjabab siteremi ndungisa.”
Terdauhen Ketua Umum Moderamen GBKP Pdt. Krismas I. Barus, MTh. LM nehken gagasen kerna produk layanan sitetap jadi implementasi sasaren pelayanen alu partisipasi aktif ras kolaborasi selaku metode si paguh secara spiritual, psikologis ras budaya guna mpepaguhi kekelengen ras kabanggaan perpulungen nandangi GBKP. Langkah pemetaan jemaat dingen talenta bas perpulungen dingen optimalisasi peran aktifna tentu memantapkan peran GBKP. Arah pemanfaaten anggaren pe ipersingeti segelah teridah ulih penterjemahan rikut pelaksanaan sasaren pelayanen seh kutingkat simeterukna bas struktur organisasi GBKP. Alu bage lit pemahaman perpulungen rikut ndukungsa.
Bas pemanfaaten digitalisasi teknologi banci imanfaatken bas format planning, monitoring ras evaluasi program. Bage pe pemanfaaten dunia IT/medsos perlu ipakeken alu pentar selaku media simpepaguhi pelaksanaan tritugas gerejawi. Janah salah sada sistrategis eme pengelolaan GBKP TV ku lebe wari enda.
Semangat sinergisitas dingen kolaborasi partisipatif tetap ijadiken strategi pencapaian sasaran pelayanan, dingen menghindari tumpang tindih program ras pelayanen. Enda erbahanca kinerja GBKP jadi efesien rikut efektif bas tantangan internal, rikut pe eksternal bas aras local, nasional seh Internasional. Guna menguatkan kinerja GBKP terus pe ibangun partnership jejaring kemitraan ras gereja-gereja, lembaga dingen pemerintahan.
Bas SKMS enda pe pengendesen pengergaan man Pendeta si enggo melayani 25 tahun isehken Moderamen GBKP man Pdt. Natallidna br Tarigan, MTh, Pdt. Sabarita Magdala br Munthe, MTh, Pdt. Agustinus Sembiring, MTh, Pdt. Perlindungen Pinem, STh, Pdt. Misalta br Kaban, STh, Pdt. Berthalyna br Tarigan, MTh, Pdt. Jenny Eva br Karosekali, STh. M. Min. Pdt. Bahagia Tarigan, MTh, Pdt. Agustinus br Peranginangin, STh, M. Psi, Pdt. Abner Girsang, STh.
Kidekah 3 (telu) wari kerina utusen kemahen Tuhan enggo menggumuli dingen notoken program rikut keuangen bas SKMS 2023. Kerina keputusen sienggo ibuat iarapken banci iterapken dingen ilaksanaken ku wari sireh enda, gelar Tuhan terpuji dingen termulia.
(Pdt. Imanuel Kemenangan Ginting, STh. Biro Humas dan IT Moderamen GBKP).