Jumpa Jesus, Eme Ulu Kedamen Situhu-Tuhu
Pdt. Imanuel Ginting, S.Th | 24-12-2023Kabanjahe, 23 Desember 2023.
Bas situasi doni sigenduari la bagi ukur, perlu idatken ulu kedamen situhu-tuhu. Perang, bencana alam, perubahan iklim, krisis ekonomi, proses politik sierbahanca kegeluhen dem kinilatihen kula ras pertendin, kiniseran, aru ate. Bas kotbah siipalasken bas Luk 2 8-20 Pdt Johan Barus, STh (pensiunan) ningetken, Kita suruhen Tuhan mbabai dame ku doni enda. Perayaken gelah kerina sierdahin bas Moderamen GBKP tambah semangat, akrab, kompak bas pelayanan. Enggo nge dame pusuhndu? Simpetetap ukur pendahinta e persuruhen Tuhan. Temata enden malekat i adepen permakan. Kerina ia sengget bas ngidah kejadin sibage rupana, turah kebiaren erkiteken belinna berita e. I bas kesenggetan ras kebiaren permaken lit keriahen ukurna, sebab isehken berita ketubuhen Juruselamat. Kebiaren salih jadi keriahen.
Terdauhen isingetken Pendeta enda kerna pengalamen permakan ipakeken Lukas selaku bukti sejarah ketubuhen Juruselamat e. Bukti e selaku Kata Dibata. Adi lit penungkunen, pengalamen permakan jadi jawabenna. Jesus labo hanya manusia, tapi Persuruhen Dibata situhu-tuhu. Malekat ndahi permakan, labo jelma sideban. Secara sosial permakan la masuk beligan, rendah. La erluhu, tapi ia siijumpai malekat Tuhan. I adepen Dibata kerina jelma seri kecibalna. Ia erkuasa makeken ise atena jadi persuruhenna bas nehken berita sinbelin e. Permakan bas kemeterukenna banci jadi usihen bas erberita simeriah. Silemah, meteruk, musil iangkatken Dibata jadi jelma simeganjangna-Jahwe kap Permakan situhu-tuhu.
Keriahen jadi ukur permakan, ia me sipemena ngerayaken ketubuhen Tuhan Yesus. Turah kegiahen ras kinipangenna bas nekehken berita ketubuhen Juruselamat alu berkat ku Betlehem. Ipesehna kai siisehken malekat, selaku cikapen Jusuf ras Maria ngaloken Jesus.
Cara permakan ernatal banci jadi sukat-sukat. Kai standar dame? Karo mergana adi erisi kuncangna, e enggo dame, tapi labo seri standar kerina jelma kerna perdamen. Dame bas pusuh. Tapi suasana pusuh banci la seh ku suasana salamen natal, ras kai ibelasken babah. Permakan mis ia berkat, uga litna, entah mbetu nge pe pergonjena. Tapi jumpa permakan ras Anak e, e jadi keriahen ras kedamen atena-jumpa! La sia-sia, la lasam kinilatihenna. Gundari soal kai judul pujin, aksesoris, nuansa paken, mbuesa man persikapen. Enda tren jaman now, uga gelah viral penampilan. Apakah alu bage enggo dame? Dame sekejap, tapi Tuhan Jesus lanai teridah, tangis Ia i teruh pokok mangga, la bas pusuhta. Ula kita terpuji, piah Dibata enggo arah pudi.
Kita menang bas penderitaan, eme kedamen. Menikmati ras mensyukuri emaka dat dame, labo dasar artifisial kiniliten bas kinibayaken semata. Bas perayan Natal Moderamen GBKP, ipersingeti gelah tetap ndahiken dahin persuruhen Tuhan. Bagi permakan siarusna tunduh bas latihna, tapi bas ia erjaga reh malekat. Ula aturna erdahin denga tapi enggo lawes. Ula ban enterem kalak kecewa, segelah ula bene dame pusuh. Bas hal-hal sikitik, adi setia, tutus banci dat dame. Kekompaken permakan, ersada arih, ndarami Tuhan, kompak ersaksi. E manfaat, modal pelayanen. Dame ras malemlah ate sierdahin Tuhan.
Ketua Umum Moderamen GBKP Pdt. Krismas I. Barus, MTh, LM bas sambuten Natalna ngingetken penghayaten Natal mbabai kalak singerayakenca reh semangatna mbere dirita una kiniulin sideban. Bagi Jesus nadingken kiniulin surga reh man gunanta. Sipeteruk dirita guna nambahi dolat daging jelma sienterem. Bas ngalo-ngalo tahun politik 2024, ikutlah kita kerina mbereken sumbangsih terbaik, ula golput! Entah la ikut berpartisipasi bas pemilihen. Bereken pusuh man caleg GBKP. Sitotoken segelah reh buena jemaat mbereken pelayanen terbaik man bangsa ras negara. Moderamen GBKP dem keterbatasen tetaplah ibaba bas pertoton mpekena gerejata.
Acara Natal siilakoken i GBKP Rg. Asrama Kodim enda ertambah hikmat alu pujin Natal siisehken keluarga Moderamen, pegawai Moderamen, keluarga besar Pendeta pensiunen, tim Marturia, Saitun Runggun Asrama Kodim. Rombongen Ketua Panitia Perayaan Natal Pdt. Rena Tety br Ginting, MTh sekaligus selaku Panitia Ramah Tamah Tahun Baru ras Pencanangan sasaran pelayanan 2024 pe reh i Binjai nari nehken selamat Natal dingen nehken bingkisan Natal man kerina sihadir.
(Pdt. Imanuel Kemenangan Ginting, STh).