Bahasa Indonesia

Moderamen GBKP Nehken Selamat Tahun Baru Ras Tali Asih Man Pandita Si Sakit I Medan

Pdt. Imanuel Ginting, S.Th | 12-01-2024

Medan, 12 Januari 2024

Mbengketi tahun 2024 Moderamen GBKP nehken selamat tahun baru, rikut kata pergegeh ras semangat man Pandita-Pandita GBKP si sangana lit bas keadaan sakit. Dahin enda ilakoken man Pandita-Pandita si tading i sekitar Medan, erkiteken ingan tading, bagepe bas perawaten segelah ndeher ku Rumah Sakit ingan perawaten i Medan.

“Kerehen kami bas Moderamen GBKP nari nehken tedeh ate, nehken selamat tahun baru, rikut nehken tali asih bas ngawan perpulungen sierdiate dingen nampati segelah kam Pandita kami lampas madaan, tetap semangat. Tuhan Jesus tetap ngkawali ras naruhken kita mbentasi tahun 2024 enda,”nina Sekum Pdt. Yunus Bangun, MTh bas perjumpaan ras Pdt. (pensiunen) N. Keliat, MTh. Pendet ras keluarga tuhu-tuhu ermeriah ukur bas ngalo-ngalo kerehen Moderamen GBKP. “Aru kal ate kami rikut meriah ukur, sebab la kal iarap kami bas kesibukenndu kerina kam Moderamen GBKP banci nempatken reh ndahi kami ku rumah enda. Tentu enda pe jadi semangat ras keriahen man Pandita, bapa i tengah jabu segelah ia semakin sehat ras semangat. Rikut isehken kami melala kal bujur bas tanda kekelengen siipersembahken ngawan perpulungenta nari, Tuhan ersimulih bas pemere enda. Enggo 3 tahun kondisi Pandita sakit, janah genduari semakin baik terus,” nina Nora bas nehken kata ngalo-ngalo Moderamen GBKP.

“Aku harus mampu mengelola pikiran ras mentalku bas situasi sakit, disiplin mengelola asupan makanan. Bas paksana sanga sindai tuhu-tuhu enggo kritis, termasuk pembengkakan erkiteken cairen. Melala analisa medis ras seh pe rencana tindaken operasi, tapi bas ndarami second opinion dungna alu tambar si pas rikut pertoton pengendesen man Tuhan, kesehaten rikut kepulihen banci bagenda ulina,”nina Pdt. Rosnelly. “Kebetulen piga-piga keluarga dekat, bas paksa sindai terkena pinakit sikurang lebih seri ras pinakit Pandita, janah kalak ndai kerina enggo ngadap Dibata. Emaka aku pe seh kal kuakap latihna ngukuri ras ngarak-ngarak Pandita. Puji Tuhan, sampati Tuhan bas kinimadaan Panditata,”nina Naras ngumputi. Bas pendungi perkunjungen enda kerina idungi alu pertoton siibabai Pandita bas Moderamen GBKP nari.

Tentu bas kiniliten kondisi kesehaten simenurun, kerehen Moderamen GBKP tuhu-tuhu nambahi semangat ras keriahen ukur kerina Pandita ras keluarga. Bas keadaan sakit erkiteken rukur sisada mekatep si sakit jadi dua kali sakit, sakit fisik, bagepe sakit perukuren. Tim siberkat bas Moderamen GBKP nari eme Pdt. Yunus Bangun, MTh, Pdt. Mestika Ginting, Pdt, Jennie E. Keliat, Pdt. Natalidna br. Tarigan, Pt. Jetra Sembiring, Pt. Mulia Perangin-angin, SE. Bas kesempaten enda siikunjungi Moderamen GBKP eme Pdt. (pensiunen) N. Keliat, MTh, Pdt. Rosnelli, Pdt. Fery Ginting, Pdt. (pensiunen) Gidion Ginting, Pdt. Meliwaty br Bukit, Pdt. E. P. Ginting, Pdt. Efranta Sembiring ras Pdt. Ester. Tetap sibaba bas pertotonta segelah kerina Panditata si sakit pedas pulih rikut madaan. Kita pe kerina tetap sehat-sehat teruh kuasa pemasu-masun Tuhan-ta Jesus Kristus ndalani tahun 2024.

(Pdt. Imanuel Kemenangan Ginting, STh. Biro Humas dan IT Moderamen GBKP).