Moderamen GBKP Memperjuangkan Hak Milik GBKP Guna Mpepaguhi Pelayanan
Pdt. Imanuel Ginting, S.Th | 01-02-2024Medan, 30 Januari 2024
Tegak lurus ndalanken amanat keputusen SKMS guna mulihi mengelola taneh penading Zending ras pengamanan aset RC Taman Jubelium 100 tahun GBKP i Sukamakmur, Moderamen GBKP eraudensi njumpai Ketua DPRD Drs. Baskami Ginting i Kantor DPRD Provinsi Sumatera Utara Jl. Imam Bonjol Medan.
I bas penjelasan tim Moderamen GBKP ras Biro Hukum sireh, Sekum Pdt. Yunus Bangun, MTh nehken maka, “Terjadi salah objek penguasaan lahan i RC. Moderamen GBKP enggo njumpai Kepala BPN Kab. Deli Serdang, janah enggo ia erjanji memediasisa. Rikut pe amanah kerna taneh tinading zending RS Kusta i Lau simomo, enggo igargari fakta sejarah rikut dokumen i Utrech Belanda, la lit keraguan maka i bas mulihna zending ku Belanda ndube, taneh enda iendesken man GBKP, bas proses si lit gundari ikuasai Dinas Kesehaten Provinsi Sumatera Utara. Kerna sienda ipindoken segelah banci min Ketua DPRD nampati alu memediasi rikut mpejumpaken para pihak.” Penjelasan kerna penguasaan sepihak pengusaha taneh i RC Taman Jubelium 100 tahun GBKP Sukamakmur, bagepe kerna taneh tinading zending i Lau simomo, Ketua DPRD banci memahami dinamika masalah sengketa taneh, enda rikut Ketua DPRD bersedia memediasi ras pihak-pihak sibersangkuten. I bas sie irencanaken ilakoken rapat dengar pendapat (RDP) ras pengusaha, perorangen entah pe pihak pemerintah provinsi (Gubernur), dinas kesehaten sierkawiten ras persoalen enda. “Iarapken alu perjumpaan e banci bemusyawarah, e nge simehulina,”nina Ketua DPRD. I bas perjumpaan epe teridah sura-sura GBKP bas amanat Sidang Kerja Majelis Synode labo sekedar penguasaan mulihi nandangi hak milik ulih penading zending ndube, tapi terbagesen uga segelah tinading enda bas paksa sigenduari banci ikelola alu optimal mendukung, mpepaguhi pelayanan, pelaksanaan tritugas GBKP, contohna menjadi pusat percontohan kawasan pertanian terpadu.
Bas diskusi kerna situasi dinamika politik sigenduari pe Drs. Baskami Ginting mengapresiasi sikap Moderamen GBKP, “GBKP jadi benang penjarumi, ola berpolitik praktis, alu la bersikap partisan mendukung partai politik tertentu, entah sekalak-sekalak calon, tapi tetap nehken pesan moral kerna pemilu sijujur, adil, bebas, rahasia dingen menolak ‘politik uang’,”nina nehken pesanna.
Kuwari silebe enda pe Ketua DPRD Prov. Sumatera Utara Drs. Baskami Ginting ningetken kerna komitmenna guna mendukung renovasi/pembangunen Kantor Moderamen GBKP bagepe infrastruktur guna GBKP TV. Tim Moderamen GBKP sireh eme Pdt. Yunus Bangun, Pt. Jetra Sembiring, Pdt. Christhoper Sinulingga, Pdt. Jennie br. Keliat, Pdt. Kalvinius Jawak, Pdt. Mestika Ginting, Pt. Mulia Perangin-angin, Rubianto Sembiring, SH selaku Ketua Biro Hukum ras jajaran pengurus Biro Hukum. Perjumpaan enda idungi alu pertoton rikut man ciger ras sienggo isikapken tuan rumah. (Pdt. Imanuel Kemenangan Ginting, STh. Biro Humas dan IT Moderamen GBKP).