Orbituari Ngadi i Bas Dame Pdt. Simon Tarigan “Pendeta Siparipurna Ngelai i Tengah GBKP”
Pdt. Imanuel Ginting, S.Th | 17-08-2022ORBITUARI NGADI I BAS DAME PDT. SIMON TARIGAN
PENDETA SIPARIPURNA NGELAI I TENGAH GBKP
Kabanjahe, 16.08.2022 , Wari Sabtu 13 Agustus 2022 ilakoken peresmian kantor saitun GBKP i kompleks PPOS Sukamakmur. Kerina pengurus rikut donatur ras tamu undangan lampas reh i bas acara si dem keriahen e. Keriahen perjumpaan enda iselingi alu ramah tamah simbabai pertawan bagi semalna perjumpan orang tua. I bas acara e Ketua Saitun Pdt. Simon Tarigan ndungi kerina kegiatan rikut penandatanganan berita acara, rikut pe nehken kata sambuten selaku pengajuk guna mbabai kemajun dingen kiniulin pelayanan sinehken pujin man Tuhan si Mada Gereja.
I bas nandangi pendungi kerina acara Ketua Saitun nggejapken situasi si kurang sehat, janah irawat i klinik PPOS. Menjelang makan siang kondisi agak menurun dingen mis ibaba ku Puskesmas Bandar Baru. I bas pemeriksaan tim medis i je maka Pendeta enda enggo ngadap man Tuhan. Emaka ibaba ku RS Efarina Kabanjahe guna banci ipesikap seh wari Selasa, tgl 16 Agustus 2022 nimai kerehen kerina anak-anak sikedauhen nari. Berita enda tuhu mbabai kearun dingen kinisenggeten man si enterem, terlebih enterem Pendeta si sempat jumpa ras ercakap-cakap ras Pandita enda i RC erkiteken lit konpen wilayah II.
Pendeta alumni STT Jakarta enda sekalak ndalani kegeluhen pelayanenna i bas sikap sibersahaja dingen sederhana. Pelayanen Runggun Serdang, Sibiru-biru, Sukanalu, Berastagi kota, Kepala Departemen Persekutuan, PPWG GBKP dingen 2 periode selaku Sekretaris Umum GBKP (2005-2010, 2010-2015), bagepe i bas masa pensiun tetap ipercaya i bas unit pelayanan YAK/Parpem GBKP (2015-2020), dingen selaku Ketua Kategorial Saitun (2020-2025). Hubungen antar unit pelayanan/biro ras kerina secara personal, dingen pegawai kantor Moderamen GBKP pe terjalin i bas hubungen sikontributif dingen saling mendukung i i bas arahenna.
Melala tuhu si jadi peringet-ingeten kerna kegeluhen Pendeta enda. I bas kinijingkaten dingen ketelitian i bas pengarsipan dokumen ia tuhu-tuhu terandalken. Enda mbabai pendahin selaku tim kerja moderamen jadi menahang man rarasen sisada pendahin i i bas periodena. Nginget kelengkapen pelayanenna si setia seh i bas masa pensiun pe ia tetap setia mengabdi, rikut situasi pendahin siterakhir siterjadi i bas peresmian kantor Saitun, Pdt. J. Perangin-perangin selaku teman sada rarasen sipernah ras i Moderamen GBKP ngataken maka,”Ia sekalak Pendeta si paripurna i bas pelayanen, seh kupendungi geluhna tetap setia i bas pelayanen.”
Man Pendeta singuda denga pe i bas tiap perjumpaan, kata-kata persinget rikut pedah siisehken pendeta eme kata simenguatkan rikut memotivasi setiap Pendeta segelah megenggeng dingen megegeh i bas pelayanen. Malem ate kerina Pendeta sijumpa ras ia. Seh pendeta sindatken pendisiplinen pe ngasup nge ngaloken keputusen/kecibal silabagi ukur arah pastoral siisehken Pendeta enda. Emaka i bas tanggungjababna si mbelin sikap membangun harmoni dingen perdamen pe paguh kal i bas prinsipna, si sue ras Alkitab, Tata Gereja GBKP rikut pe Garis Besar Pelayanan Gereja.
Man kerina keluarga siitadingken Pendeta enda, Nora Roslianna br Ginting, anak-anak Teopilus Suranta Tarigan, Os Ertanta Tarigan, Jeny Irene br Tarigan seh ku kempu kerina sitotoken megegeh dingen saber, rikut pedas terapul i bas palas kiniteken dingen keselamaten i dur Tuhan-ta Jesus Kristus. Tole pe segelah keluarga tetap semangat muat bagin i bas pelayanen i tengah GBKP kulebe wari enda, sebab cataten keberhasilen pelayanen Pdt. Simon Tarigan eme cataten keluarga sisaling mendukung rikut menopang i bas pelayanen tritugas GBKP.
(Pdt. Yunus Bangun, MTh. Sekretaris Umum. Pdt. Imanuel Kemenangan Ginting, STh. Biro Humas dan IT Moderamen GBKP)